Custom Search

Sunday, January 25, 2009

كلمات اصلها فرعوني وبنستخدمها حتي اليوم


الاول كده بالمره عاوزين نقول ان الكتابه في مصر الفرعونيه مش الهيروغليفيه بس

زي ماهو الشائع

الهيروغليفي : اقدم كتابه عرفها التاريخ المصري هي كتابه تصويريه متقنه يغلب عليها الزخرفه

وكانت بتنقش علي الجدران والاحجار والمعابد والاخشاب باستخدام الازميل(اطلق عليها الهيروغليفيه الاغريق لما دخلوا مصر يعني النقش المقدس لانها استخدمت في المعابد والمقابر لنقش النصوص الدينيه ) وزي ماقلت هي تصوريه يعني ذراع مثلا العمل القوه عين يعني الرؤيه الابصار اذن يعني السمع وهكذا


الهراطيقي : وده خط سريع يعتمد علي الصور المختصره وهو تبسيط للخط الهيروغليفي

(اطلق عليه الهيراطيقي ويقال ان هيراطيقي مشتق من Hieratikos)) يعني كهنوتي لان الخط ده كان الخط اللي بيستخدمه الكهنه للكتابه لانه سريع

مناسب للامور الدنياويه والدينيه ومناسب لورق البردي اللي عاوز خط سريع


الديموطقيه : هو خط ابسط من الخط الهيراطيقي (اطلق عليه الاغريق الديموطيقي من (demos) يعني ديموتكيس

الشعبي وده ملوش علاقه بالطبقات بس مقصود انه خط المعاملات اليوميه زي خط الرقعه عندنا كده


الخط القبطى : فهو يمثل الخط الرابع والاخير من مراحل خطوط اللغة المصرية القديمة
كلمة قبطى اشتقت من اليونانية ( ايجبتى ) اى مصرى ولقد كتب الخط القبطى بالابجدية اليونانية اضافة اليها سبع رموز ماخوزة من الديموطيقية نظرا لعدم وجود ما يقابلها باللغة اليونانية وربما كان السبب فى كتابة هذا الخط بالابجدية اليونانية هو وجود الغزاه اليونان مما جعل المصرى القديم اللجو لذلك حتى يكون هناك وسيلة للتفاهم معهم عن طريق الكتابة بابجديتهم اليونانية ولم يتم الغاء الخط القبطي في مصر حتي بعد

دخول الفتح الاسلامي الي ان الغت في عهد عمر بن عبد العزيز علي صعيد الدواوين

وعلي صعيد الشعب في الدوله الفاطميه


الكلمات بقي ومش عاوزه حد يضحك ولا اسمع نفس
(فوطة) اى منشفة
(البشكور) اداة تستخدم فى الفرن البلدى (في الصعيد دي لكن في الفلاحين اللي هو العود)
(الماجور) اناء لعجن الخبز(في الصعيد برضه دي)
(شرش لبشة زباطة مشنة ويبة اردب (للمكايل) وكلنا عارفين المشنه
(الطورية الفاس الشونة الشنف) ادوات الفلاح
(البكلة) اى القلة

دبش ودقشوم اكيد كلنا بنسمع كلامه زي الدبش( الدبش او الدقشوم) طوب صغير

البيبي الصغير بنقول عليه ايه (نونو ) نونو يعني طفل صغير بالفرعوني
لما بيجوع بيقول ايه(مم)

لما يعطش )امبو)

ولما يتخربش او يتعور (واوا) يعني هيفا بتتكلم فرعوني هههههه

ومعنى الثلاثة كل اشرب ووجع


ولما يعمل حاجه غلط (كخ)اى قذارة
ولما نعلمه يمشي بنقوله (تاتا تاتا)معناها امشى
ولما نخوف حد نقوله( البعبع) وده اسم عفريت
واما نقول لحد عشان نخضه (بيخ) ومعناها العفريت او الشيطان
وان الولد كبر ولعب بالشارع ووسخ ملابسه تقول الام انت (سخمت ) وسخت ومنها (سخام ) قذاره
ونحن نقول دا شى(ياما)ومعناها كثير
وكلمه العنتيل دي سمعتها في فيلم لاحمد زكي هههه( العنتيل) اى القوى الشديد
واذ تكلمت مع صعيدى يقولك عايز( اش) بمعنى ماذا
والهدوم باشت من الغسيل ( باش )اى لان او طرى
ومنها الله يبشبش الطوبه اللي تحت راسه ( بشبش ) لاينها
ولما نقول الدم بيبك من عروقه ( بك ) اى نزل
ولما نقول تعبي راح علي فاشوش ( بوش او بشوش) ومعناها فراغ او خواءاو عدم
واما نقول علي حد تليس ( التليس )اى الزكيبة
بكره يطلع النهار طايب ( طايب) اى اى به هواء عليل
ده كوش علي كل حاجه ( كوش ) استولى
ولما نقول قالي كاني وماني ( كانى ومانى) اى سمن وعسل

دكان الزلاباني (الزلاباني ) يعني الفطاطري او صانع الحلوي
الواد ده مهيص ومنها هيصه (مهيص) اى مملوء رغبة فى النط والقفز
ولما نتضايق نقول كتك اوا (اوا ) ويل
وفى الحر نقول الدنيا ( صهد)اى شديدة الحرارة الافحة
وبنقول لما الدنيا تطري (تطرى) اى تلين وتطيب
وبنقول لما الفجر يشاشا (يشاشا ؟) اى ينور
لما حد يقول اكل الخروف حتتك بتتك (حاتا باتا او حتتك باتتك) يعني بقي جلد على عظم ومنها الحاتى
ولما بيقولوا طمس الاخطاء (طمس)اى دفن
وفى الاغاني (يا ليلى يا عينى)ومعناها انشراح وافراح
ولما ننصح احد نقوله تريس ( اتريس) تيقظ وتعقل
ولكا بنقول صوته زى الوابور اللى بيوش (بيوش) اى يصرخ ويصوت ويصيح
وكتير بنسمع كلم يشون يعني حزن ومنها الشونه بتاعه القمح(الشونه)اى مخزن الغلال
والمراكبية ينادون يلا هيلهيصا (ياللا هيهليصا)اى سقطنا فالوحل
واما بنشجع حد بنقول هيلا هوبا(هيلا هوب)اى نشتغل ونعمل
واما بنقول اهو اتبط منها بطط (بطط) هرس

واما بنقول ارخي الستاره (رخي ) اسدل او نزل

وكلم شبشب (سب سويب ) يعني مقاش القدم

واما بنقول علي حد انت هتخم (خم ) يعني خدع

واما تسمع كله حبه مش عارفه مثال بس انا سمعتها (حبه ) قليل

وكمان كركر لما بنقول للنونو كركركررررر(كركر) الضحك

ست يعني واحد ه ست وستي (ست ان بر) يعني ست ال بيت

سي السيد ( سي ان بر ) يعني سيد البيت

لما بنقول سك الباب (سك ) يعني اغلق

ولما حد صعيدي يقول (اباي ) دهشه وتعجب وتافف

وكلمات تانيه كتير كل شويه هقول حبه

علي مراحل عشان نطري المدونه ههههه(ايه نطري فرعوني اصلا اياك حد ينطق )

لكن المره الجايه هنتكلم عن عصر ماقبل الاسرات

اوعوا تغيروا المحطه

التاريخ كما احب مش هتقدر تفتح عنيك هههههههههههههههه

12 comments:

صبرني يارب said...

حلو اوي يا كوكي

قريب شوفت برنامج بيتكلم عن نفس الموضوع وقال برضه كلمات كتير غير الى قلتيها

ده احنا بنتكلم فرعوني بقى وما حدش عارف هههههههههههههههههههههه

باموت انا فى الفراعنه كانوا ناس محترمين عقبالنا

ضد التيار said...

ولما نتضايق نقول كتك اوا (اوا ) ويل

اخيييييييييييرا عرفت معنى كلمة اوا

دايما كنت بقولها و بقول ماحدش يسأل يعنى ايه ( اوا) دى لانى معرفش انا بسمعها كده ):

بس بجد معلومات جميلة و خفيفة تسلمى عليها

منتظرة الباقى ياقمر

تحياتى (:

mony said...

كده خلااااص

هاتولي واحد هيلوغريفي علشان اكلمه


انا كده بقيت بعرف اتكلم هيروغليفي كويس



مش هيلوغريفي ده برضه يامادي

ولا الناس هتقول البت ديه اتلحست ولا حاجة

~*§¦§ Appy §¦§*~ said...

حلوة يا مادى انا بحب حاجات الفراعنه دى جدا بجد وهتابعك اوى ومش هضحك يا حبيبتى لانى جيت فتره انشغلت بالتحنيط بس زهقت وطلعت بسرعه ههههههههه

يوميات فنانه مفروسه جداا said...

والله رافوووو

حاجه جميله وتدوينه تحفه ماشاء الله

تقبلي مروري الاول

سلام

mayada said...

صبرني يارب
_____________

كوكي مين ياصبرني هههههه
شويه شويه تقلولي بيتك بيتك
اه ياقمر دول جداا في كتب ومراجع ودراسات للكلمات دي مش علي قد برنامج بس وانا كل شويه هقول شويه

ضد التيار
_____________
حيييييييييي عرفتي اني مكشوف عني الحجاب
هههههههههههه وعرفت انك عاوزه تعرفيها فجبتها
نورتي ياقمر

موني
________________
تعال ياموني
قربي هنا تعالي متخافيش
املص ودانك يعني هههههههههههههههه
الكلمات اسمها لغه مصريه قديمه
لكن الهيروغليفي ده خط ياسكر
ينفع تقولي انا بتكلم نسخ او بتكلم كوفي
ههههههههههه الكتابه حاجه واللغه حاجه والهيرغليفي والديمطيقي والهراطيقي والقبطي خطوط والقبطي برضع في اللغه القبطيه وهي برضه بتندرج حت المصريه القديمه زي مثلا برمهات وطوبه واسماء الشهوردي
والله مصري قدي م ياحبيبتي اتكلمي وافردي براحتك

ابي
__________________
زهقتي ليه ياسكر ان شاء الله
هتكلم عن التحنيط برضه من اول التفكير فيه بطريقه غير

يوميات فنانه مفروسه
______________
نورتي البلوج ياسكر مرسي لتعليقك ياجميل

هبة المنصورى said...

على فكرة فيه كتاب نازل تبع الهيئة العامة للكتاب عن الألفاظ العامية اللى أصلها فرعونى للمهندس سامح مقار.. شفتى! نسيت أسأل عليه ف المعرض.... ماعلينا عاجبنى أوى موضوع كانى ومانى ده :)

Soooo said...

الله

موضوع حلو قوي
بجد حلو حلو حلو

واكتر حتة مستمخ منها .. بتاعة حتتك بتتك
لأني بجد كنت محتار مش عارف ايه مصدرها

استمري يلا .. عايزين نعرف ايه حوار التحنيط ده




سلامووووووووووووز

mayada said...

هبه المنصوري
منوره ياهوبا حي البلوجر نور
برجوعك تاني
وانا كمان بحب كاني وماني خالص
_________
سوووووو
منور ياسو البلوج عودا حميدا
وحوار التحنيط هنوصله ان شاء الله
حاتا باتا ههههههههه
عرفت معناها
سلامانجه

أ / أحمد عبد المنعم said...

بسم الله الرحمن الرحيم
الأخت الفاضلة
أشكرك شكرا جزيلا على معلوماتك الجميلة والرائعة
استكملى بحثك وعرضك
لكن هل هذا الكلام منقول عن مصدر معين أم أنه جهد بحثك أنت .
إن كان منقولا من مصدر فأرجو الإشارة إليه
أما إن كان جهدك أنت فأعانك الله على استكماله حتى يكون كتابا يضم الفكرة كاملة

mayada said...

استاذ احمد ده منقول من مصادر كتير
كل المعلومات دي اطلاع ودراستس اصلا
اما حكايه ذكر المرجع فالنقطه اللي وصلنا لها لاتحتمل ذكر مراجع لان مفيش اختلاف عليها(كتب كتير اكدتها ) ونقط بسيط لكن بعد كده هنذكر مراجع اذا دعت الحاجه
وعامه راجع سليم حسن باجزاءه هو احسن ماكتب عن مصر الفرعونيه

Rain_Drops said...

الكلام دا للأسف بيدخل فيه مغالطات كتير سواء بسوء نية أو بسبب الجهل، بس ما توصلش إنهم يعتبرو اش فرعونية! دي كلمة بتستخدم في كل اللهجات العربية حتى في لغة مالطا، متهيألي ماكانش فيه فراعنة في مالطا !
أباي دي كلمة عربية بتستخدم حتى في العراق، ومعظم الأفعال اللي ذكرتيها كمان عربية فصيحة، كفايا إن فعل زي طمس مذكور في القرآن، ازاي نبقى احنا واخدينه من أجدادنا الفراعنة ؟!