هو المفروض النهارده الموضوع عن الملك مينا موحد القطرين بس انا عاوزه ارتبه كويس بحيث ان الكل يفهم الموضوع ويبقي خفيف
فالنهارده جبيت حاجه بسيطه كده عن عظمه المصري القديم وتقدمه وتفوقه في مجال الطب احنا عارفين ان المصري القديم عرف الطب بس عقلنا مش واصل لحد فين هو متقدم فانا جبت كام معلومه بسيطه توضح مدي التقدم اللي وصل له اجدادنا
1_ طبعا كلنا نسمع عن البلهارسيا (اللي مسمعش يسلك ودانه ويسمع معايا) معروف ان البلهارسيا اكتشفها عالم الماني اسمه بلهارتس 1850 وعشان كده سموها بلهارسيا ولكن المعلومه دي غلط ونحب نقول للالمان خدعوكم فقالوا لان المصري القديم اكتشف البلهارسيا قبل الميلاد وسماها عاع AAA__ وده متسجل علي جدران المعابد مش بس كده مش بس كده ده المصري القديم كمان اكتشف علاجها اللي هو ( الطراطير ) للناس اللي تعرفه هو كان مستخدم لفتره قريبه لعلاج البلهارسيا (الحقن ) والطراطير ميفعش يتاخد كشراب لازم
بالوخز وعشان المصري القديم مكنش اكتشف السرنجات فكان يتم استخدام الطراطير عن طريق الشرج
ازاي ؟ كان بيجيب التين ويعمله علي هيئه عجينه ويشكله شكل اسطوني ويسيبه ينشفه في الشمس وبعد كده
يسنفره ويعبيها بالماده الفعاله ويغمسها في العسل (كمرطب ) ويتم اخذ العلاج عن طريق الشرج يعني بالعربي كده (لبوس)
2_ دي بقي الستات عارفينها كان المصري القديم عنده قدرة انه يعرف اذا كانت المرأه عندها عقم (انسداد في قناه فالوب )ولا لا ازاي ؟ الثوم طبعا عارفين انه له رائحه نفاذه وفي مواد طياره عشان كده اللي بياكل ثوم تلاقي بعد مايهري نفسه غسيل رائحه التوم ظاهره كان المصري القديم بيجيب فص ثوم ويضع في رحم المراه المفحوصه وبعد دقائق بشم رائحه نفسها (الفم ) لو في رائحه ثوم يبقي تمام مفيش يبقي في انسداد فالبتالي الثوم المواد الطياره فيه مطلعتش لفوق طبعا الناس اللي متستهيف الحكايه احب اوضح لهم انه ده هو هو نفس الفحص اللي بيتعمل الي يومنا هذا لمعرفه قناه فالوب مسدوده ولا لا مع شويه فذلكه ان الست تقريبا بتتحقن بصبغه معينه وبعد كده ع الجهاز يشوف مسار الصبغه لو اتحركت يبقي تمام ماانتشرتش يبقي في انسداد ودي طريق معمول بها في كل انحاء العالم مهما كان تقدمها
3_ كمان المصري القديم عرف يحدد نوع المولود وعرف يعرف اذا كان في حمل ولا لا اللي هو اختبار الحمل
ازاي ؟ محدش يفتح بقه انا هوضح كان بياخد عينه بول من المرأه المفحوصه وبيرميها علي بعض حبا ت من القمح والشعير لو تم انبات القمح يبقي الجنين ولد لو تم انبات الشعير يبقي الجنين بنت لو متمش الانبات يبقي مفيش حمل اصلا وده بيؤكد ان المصري القديم كان عنده معامل لانه قدر بتجاربه يعرف ان مكونات البول لمراة حامل في جنين ولد تناسب انبات القمح او المواد العنصريه بتاعتها تساعد علي انبات قمح ونفس الحال في الشعير واكيد الايام هتكشف عن ده بس الظريف في الحكايه دي ان المستكشفين الالمان لما عرفوا الحكايه دي اجروا تجارب عندهم وده كان في التمنينات والمذهل ان التجارب اجريت ع ذكور كمان واناث حوامل وغير حوامل والنتايج كانت صح بنسبه 60%
يعني في حاله الذكور لم يتم انبات اصلا في حاله الاناث الحوامل كان انبات القمح فعلا في حاله الذكر والشعير في حاله الانثي والعلماء الالمان كانوا مبهورين بالنتيجه واكدوا ان نسبه الخطا اللي هي 40% مش بسبب كسور في نظريه المصري القديم اطلاقا ولكن بسبب التغير الجني لمحصول القمح والشعير والملوثات اللي بتعرض لها سواء الانسان او النبات وطبيعه الاكل الغير صحي اللي احنا بناكله
4_ دي بقي ملهاش علاقه بالطب ولاحاجه بس لها علاقه بالناس المتخلفه اللي لسه بتؤمن بالسحر والشعوزه والكلام الهبل ده وللاسف شريحه كبيره ومنها فئات مثقفه دي مخلفتش عشان مش عارفه ايه متجوزتش عشان عبط وكمان لها علاقه بالمشككين في عظمه الحضاره المصريه القديمه وبينسبوا انجازتها للسحر للاسف لو حطوا بدل كلمه سحر تكنولوجيا هيستريحوا واحنا هنطمن قلبهم برضه ميرضناش هريتهم
يحكي ان في عهد الملك سنوسرت التالت عرف رجل يدعي جدجي (jadjie) واشتهر بالسحر وقدرته ع احياء الموتي فامر الملك بان يؤتي بهذا الرجل وساله عن كيفيه احياءه للموتي وطلب منه ان يقوم بتجربه ع انسان
فرض جدجي واصر انها ع تكون علي حيوان فاتوا له باوزه ففصل رقبتها عن جسمها ووزعهم وبعد كده تمتم فرجعت الاوزه حيه وتكررت التجربه علي ثور ولما ساله سنوسرت انت ازاي بتغير طبيعه الاشياء رد عليه جدجي ان لا يغير طبيعه الاشياء الا الاله (المصري عرف التوحيد ) ولكن اكده ان هو خدع حواس الملك
فخيل له ان سامع الاوزه والثور وشايفهم احياء ولكن الحقيقه عكس ذلك بذمتنا مش عيب علينا بعد كل الزمن دهوبعد الاسلام مش قادرين ندرك اللي وعي اليه اجدادنا قبل الميلاد
كمان المصري القديم اتقدم في الجراحه وتشريح الجسد وهنتكلم عليه بتفصيل لما اتكلم عن التحنيط ومعلوماتنا مستمده من البرديات والمعابد والحفريات واشعر البرديات دي
ادوين سميث Edwin-Smithالموجودة بمتحف نيويورك بالولايات المتحدة الأمريكية
إبريز Ebersالموجودة بمتحف ليبزج بألمانيه
حتى الرمز الذى يكتبه كل الأطباء(R ) فى ورقة وصف الدواء التي يصرفها المريض من الصيدلية كل أنحاء العالم هى " عين حورس" التي كان يعتبرها المصريين القدماء تعويذة ضد المرض والموت.
جملة ل ( هوميروس ) في الأوديسة : قال إن الرجال في مصر القديمة كانوا أكثر مهارة فى الطب من كل البشر وده بيؤكد فضل المصري القديم علي الطب الحديث وع العالم باثره
كده كفايه عليكم دي استراحه لحد ما افضي وانزل بالملك مينا بس اوعدكم ان هيكون غير
